Mga Tula Tungkol sa Pamilya

Ang Aming Mag-anak

Ang aming mag-anak ay laging Masaya,

Maligaya kami nina ate at kuya.

Mahal kaming lahat ina ama’t ina,

Mayroon ba kayong ganitong pamilya?

Kahit sa paggawa’y pagod ang katawan,

Tulong ni ama ay lagging nakaabang

Suluranin ni ate ay nalulunasan,

Sa tulong ni inang lagging nakalaan.

Ang Munting Bata

Kahit ako’y batang munti,

Pangarap ko’y sari-sari,

Paggalang at wastong gawi,

Ginagawa ko palagi.

Sarili ay paunlarin,

Maling kilos ay baguhin

Pag-aaral, pagbutihin,

Tiyak, tagumpay ay kakamtin.

Ang Ama’t Ina Ko

Sa lahat ng tao

Dito sa mundo

Wala pang tutulad

Sa ama’t ina ko.

Sila ay naghirap

Sila ay nagsikap

Na ako’y lumaki

At sumayang ganap.

Kaya naman ngayon

Ang lagi kong layon

Sa aking magulang

Ako’y makatulong.

Ang Pag-ibig ni Ina

Ang puso ni ina’y kaban ng paglingap,

May dalawang tibok na karapat-dapat,

Ang isa’y kay ama, kay amang mapalad

At ang isa nama’y sa amin nalagak.

Noong nabubuhay ang ina kong irog

Ang kanyang pagkasi’y samyo ng kampupot,

Ang lakas ng puso’y parang nag-uutos

Na ako, kaylan ma’y huwag matatakot…

Pagibig ni ina ang siyang yumari

Ng magandang bahay na kahilihili,

At nawag sa palad na katangitangi.

Timtimang umirog! Hanggang sa libinga’y

Dala ang pagkasing malinis, dalisay,

Dala ang damdaming kabanalbanalan.

Tula kay Ama

Nagising nga akong tila nangangarap na isang anino

sa maputing tabing ng aming kahapong nilikha ng tao;

sa pagkakawalay sa isang magulang ay waring natuto

nahawi ang ulap na nagbigay silim sa kanyang talino.

Siya’y naparuol walang abug-abog sa rugtong ng tali,

ang kinahinatnan ay signos ng ulap ng panunubali;

kanyang kaluluwang nakitalamitam sa dilim na tangi

ay nakipanaghoy sa luha ng anghel habang nagmumuni.

Kay lungkot isipin ang gayong kasaklap na pagkakalayo

na kung gunitain pati hininga ko ay halos mapugto;

at pati ang langit ng bagong umaga’y waring nagdurugo

at ang dapithapon kung pagmamasdan ko ay naghihingalo.

Haplos ng pag-ibig ang naiwan niya sa supling ng puso,

kanyang inulila’y may bakat ng luhang sa pisngi dumapo;

kay Ina ang buhay ay ibayong saklap sa pagkasiphayo

at may nakalaang tiising pasanin sa kanya’y titimo.

Ngayon kung babalik sa pinag-iwanang lubid na putol,

dadamhi’y pangako sa luksang pangarap na tinatalunton;

tataas ang mukha’t lalong kikisig pa sa taglay na suot

at damdaming ama’y hahanga ngang lubos sa sariling hinlog!

Tags: halimbawa ng tula, mga tula, tagalog poems, tula, tula tungkol sa pamilya

Category: Mga TULAng Pambata